Björg og Ógöngufjallið með fjölda ísfossa í fallegu vetrarveðri

Hátt í 40 manns sóttu mótið bæði innlendir og erlendir, nýgræðingar og þaulvanir. Afbragðs vetrarveður var þessa þrjá daga sem mótið stóð yfir, hægviðri og lítilsháttar frost, þó fremur þungskýjað nema á sunnudeginum.

Vinsælt klifursvæði út við sjó.

Nægur ís var og gátu allir fundið klifursvæði við hæfi. Nokkrar nýjar leiðir voru prófaðar og fengu sitt nafn. Sjá umfjöllun á heimasíðu Ísalp.

“Nokkur orð um ísklifur í Kaldakinn” má einnig lesa á heimasíðunni

Fimm á leið upp flottan ísfoss

Klifurfólkið fékk allt gistingu á Björgum og flestir voru einnig í mat. Sannaðist vel málshátturinn „Þröngt mega sáttir sitja“ því að þétt var skipað til borðs og í svefnpláss. En ekki var annað hægt að sjá en allir væru sáttir og ánægðir með móttökur heimafólks, viðurgjörning og aðstæður.

Fleiri myndir má sjá á FLICKR

SBH

Fullt tungl lýsir upp fannhvíta jörð.

Stjörnubjart – og norðurljósin sýna sig öðru hvoru.

Svipmikið Ógöngufjallið fallega upplýst í tunglskininu.

Er hægt að biðja um meira?

Skriðan – 4 myndir settar saman

Í kjölfar úrhellisrigningar í lok ágúst urðu mikil skriðuföll úr Ögöngufjallinu bæði stórar og smáar skriður.

Stærsta skriðan féll skammt norðan við Grjótbrúna á svæði þar sem oft hafa fallið skriður en þessi er langstærst. Talin vera um 4 metra há og 15-20 metra breið.

Skriðan þykk og mikil

og breiðir úr sér

Drulluleðja kemur í ljós þegar grjótinu er ýtt ofan af

Við fyrstu sýn virðist þetta vera grjótskriða en þegar farið var að ryðja vegarslóða yfir hana kom í ljós að þetta er mest blaut leðja með grjótskel. Þegar gengið er eftir slóðinni dúar maður í hverju spori sem sýnir vel hversu blaut hún er.

Fleiri skriður

Margar minni skriður féllu á þessu svæði bæði malar- og aurskriður.

Einnig féllu nokkrar skriður í Litlufjörutorfunni og sumar þeirra fram af berginu.

Fleiri myndir af hamförunum á svæðinu má sjá á FLICKR

Horft upp í Litlufjörutorfu

Blíðviðri í göngum
Mynd: Þóra Magnea

Víknagöngur á þessu hausti verða áreiðanlega lengi í minnum hafðar – þökk sé blíðviðri og velgengni.

Gott var í sjóinn þannig að hægt var að flytja gangnamenn á bát út í Rauðuvík sem sparaði þeim dýrmætan tíma og orku. Síðan var hægt að leiðbeina frá bátnum hvar kindur væru og reka upp úr víkum sem flýtti mjög fyrir.

Speglun í tjörn á Kotadal
Mynd: Hlöðver Stefán

Spáð hafði verið þoku en það gekk ekki eftir því að sól og hægviðri hélst allan daginn.

Gangnamenn komu víða að eða frá Húsavík, Akureyri, Reykjavík og Kópavogi, flestir vanir en sumir að ganga þetta svæði í fyrsta sinn. Gangnaforingi var Þóra Magnea bóndi á Björgum og hafði hún með sér fjárhundinn sinn Kviku sem hún hefur verið að þjálfa í sumar.

Kvika í þjálfun

Talið er að allt féð hafi náðst heim í þessum göngum og þess vænst að ekki þurfi að fara í aðrar göngur á þessu hausti.
Hlöðver bóndi segir þetta besta gangnadag sem hann man eftir og alsæll eftir að hafa smalað Tjarnardal og Naustavíkurbotna með sínum fjárhundi, Snata.

Féð kemur niður hjá Straumslæknum

Fjárhópur og gangnamenn

Kvöldverður að hætti Konnýjar húsfreyju beið síðan gangnamanna og annarra gesta þegar heim var komið.

Gróskumikill gróður og hávaxin tré í skógræktargirðingunni

Hávaxin tré af ýmsum gerðum gefa gott skjól fyrir norðanáttinni og því virðist oft vera logn í trjálundunum þótt vindur blási fyrir utan. Elstu trén voru gróðursett fyrir 50-60 árum og eru því mörg orðin býsna hávaxin.

Lerkitré sem gróðursett voru fyrir 24 árum

Elstu trén hafa  gefið gott skjól fyrir trjáplöntur sem gróðursettar hafa verið á seinni árum eins og sjá má á þessum hávöxnu og beinvöxnu lerkitrjám sem gróðursett voru sumarið 1991. Plönturnar voru settar niður í skjóli við gamlan lerkilund þar sem mörg trjánna eru ansi kræklótt og barin af norðanáttinni.

Auðnutittlingur á lerkigrein

Fuglar lifa góðu lífi í skógræktinni eins og sjá mátti á þessum auðnutittlingi sem flaug á milli lerkigreina og virtist finna nóg góðgæti í gogginn. Einnig heyrðist í þröstum og músarrindlum en rjúpa sem oft gerir sér hreiður á svæðinu lét ekki sjá sig eða heyra í þessari gönguferð.

Birkið dafnar vel í lúpínubreiðunni

Lúpínan í girðingunni er ekki eins mikill aufúsugestur í hugum margra. Hún er þó búin að þekja melana sem voru efst í girðingunni og ýmsar plöntur dafna vel í lúpínubreiðunum s.s. birki, loðvíðir, maríustakkur og blágresi.

Blágresið í fullum blóma

Eftirtektarverðar eru stórar breiður af blágresi sem lita neðstu brekkurnar fallega fjólubláar. Rætt var á bænum hverju mætti þakka að blágresið er svona gróskumikið þarna en niðurstaða fékkst ekki í því máli. Engin beit hefur verið á þessu svæði í allmörg ár sem gæti mögulega verið skýring en þó má einnig sjá blágresisbreiður á svæðum þar sem beitt er.

Nokkrar fleiri myndir úr gönguferðinni um skógræktargirðinguna má sjá á Flickr

Aðalbláberin

Sumarið og haustið 2013 verður hér í minnum haft vegna óvenju mikillar berjasprettu, sérstaklega á aðalbláberjum.
Mikið hefur verið tínt og borðað jafnóðum en einnig sultað, saftað og fryst til að gæða sér á í vetur.
En nú eru sennilega að verða síðustu forvöð að ná sér í góð ber því að útlit er fyrir kólnandi veður og ólíklegt að berin þoli það.

Lúpínan sumarið 2013

Greinilega má sjá að lúpínan er farin að hopa á vissum svæðum í bæjarfjallinu.

Í stað kröftugrar lúpínu, sem sums staðar nær í mittishæð, vex nú gras og annar gróður.

Þetta gefur von um að í stað gróðurlítilla mela, sem voru á þessu svæði áður en lúpínu var sáð, verði innan tíðar gróðurþekja með fjölbreyttum gróðri.

Í Bjargakrók

Stöðugar breytingar eru á aðstæðum í Bjargakrók.
Skjálfandafljótsós heldur áfram að færast nær fjallinu og sandeyrar myndast hér og þar m.a. er löng sandeyri til norðurs frá enda Rófutagls og önnur mun minni til suðurs.
Mikil sandeyri er nú frá klettunum út undir flös þannig að hægt er að ganga frá gatinu töluverðan spöl til austurs og horfa þannig á bjargið frá óvenjulegu sjónarhorni.
Sandurinn í Ágúlshelli hefur lítið breyst þannig að erfitt er að komast út úr hellinum þó að háfjara sé.
Ef horft er af Flösinni inn á Hellisvíkina má sjá að engan sand hefur borið þar inn og því ekki fært frá hellinum út í víkina.
Sjá má aðstæður nánar á meðfylgjandi myndum

Dalalæða og og miðnætursól

Sérstök náttúrustemning tók á móti ættarmótsgestum þegar þeir mættu á staðinn á föstudagskvöldið.
Dalalæða lagðist yfir og huldi tún og mýrar allt um kring og síðan bættust við sólseturslitir eins og þeir gerast bestir.

Fleiri myndir frá þessu kvöldi má sjá hér

Ættarmótsgestir

Velheppnað og skemmtilegt ættarmót var haldið að Björgum helgina 26.-28. júlí. Þar hittust afkomendur Bjargar Sigurðardóttur og bræðranna Hlöðvers og Sigurbjörns Jónssona.

Gestir voru um 75 þegar flest var og nutu þeir samverunnar, góða veðursins, veitinga, fróðleiks og skemmtunar eins og sjá má á myndum.