Hlöðver og Konný

Óttar Ingvarsson frumkvöðull í umhverfisvernd og fangavörður á Akureyri hefur um skeið notað djúpsteikingarolíu sem eldsneyti á bíl sinn. Óttar á forláta Landroverbifreið sem komin er á fimmtugsaldur. Ekki alls fyrir löngu breytti hann bíl sínum þannig að nú notar hann ekki bara dísel sem eldsneyti. Hann fær matarolíu á veitingahúsum á Akureyri, einkum olíu sem notuð hefur verið til að steikja franskar kartöflur. Olíuna setur Óttar svo á landroverinn en fyrst þarf hann að hita hana og hreinsa. Veitingahúsin sleppa við förgun og ríkir gagnkvæm ánægja með fyrirkomulagið.

 Óttar telur sig eina Íslendinginn sem gerir þetta og þykir ekki ólíklegt að bíllinn hans sé sá umhverfisvænasti á landinu. Hann segist ekki hafa þurft að gera flóknar breytingar á bifreiðinni en bíllinn notar díselolíuna og matarolíuna til skiptist. Starta þarf bílnum upp með díselbrennslu vegna þess hve þykk matarolían er en svo skiptir Óttar yfir með þar til gerðum krana.

Norðmaður komst í heimsfréttir fyrir áþekka hluti fyrir skömmu en ekki þarf sem sagt að leita út fyrir Akureyri til að finna viðlíka einstætt framtak í umhverfisvernd, því mun minni mengun fylgir þessum bíl en venjulegum bílum. Þess má geta að lykt af frönskum kartöflum berst út um pústurrörið á bíl Óttars og æsir tíðum upp hungur nálægra, að hans sögn.