Hlöðver bóndi var í sjónvarpsfréttum kvöldsins.

Verið var að fjalla um ísklifrið undir fyrirsögninni: Eitt eftirsóttasta ísklifursvæði landsins

Mikill og góður ís hefur myndast í klettunum í frosti undanfarna vikna.

Ísklifurmenn hafa notfært sér þessar góðu aðstæður og var hópur  við klifur í frábæru veðri í gær.

Það voru svo sannarlega hvít jól í ár. Það byrjaði að snjóa um 20. desember og bætti í á hverjum degi þar til 28. des að birti upp með frosti og fallegu veðri. Þó var aldrei slæmt veður og ekki ófærð.

Markverðast er að þrumuveður gekk yfir á aðfangadag. Margir vissu ekkert hvaðan á sig stóð veðrið enda þrumuveður ekki algengt hér, allra síst að vetrarlagi. Einhver hélt að verið væri að taka myndir en hvort þar væru á ferðinni verur frá öðrum hnöttum fylgdi ekki sögunni :)

Jólatrén voru sótt upp í skógræktargirðingu á Þorláksmessu eins og venjulega.

Höggvin voru 4 jólatré, eitt fyrir hvert heimilanna þriggja og eitt pínulítið tré fyrir Alex yngsta heimilismanninn.

Nokkrar nýjar myndir frá síðastliðnu sumri eru komnar á myndasíðuna okkar. Sjá nánar hér.

Loks tókst að ljúka kornskurði! Ekki tjáði að bíða þess að snjóa leysti á láglendi heldur var akurinn þresktur meðan enn var snjóföl.

Fréttir eru reyndar oft lengi að berast að norðan þannig að þegar þessi frétt er skrifuð er orðið ansi langt um liðið síðan þreskingu lauk.

Uppskera var með ágætum þótt sumarið hefði verið með eindæmum votviðrasamt.

Þann 29. september síðastliðinn var farið í aðrar göngur út í Víkur. Þóra Magnea, Tommi, Nils Bjartur og Kristján í Árlandi skipuðu vaskan hóp sem sótti þangað 14 kindur. Hlöðver og Örvar stóðu á meðan vörð í Bjargarkróknum og vísuðu gangnamönnum til vegar (svokölluð gangnaafskiptasemi).

Vel gekk að koma fé heim, enda hafði verið kalt í veðri og féð sjálfsagt fegið að komast niður á tún.